هندوستان څخه د ولسمشر ټرمپ لومړی لیدنه

لیکنه : د پروفیسور چنتا منی مهاپاتره

ژباړه: د پښتو څانګی

د متحده ایالاتو ولسمشر ډونلډ ټرمپ په احمد آباد کی کوزیدو سره هند ته خپل لومړی سفر پیل کړ. لومړي وزیر نریندر مودي هغه ته د احمد آباد په هوای ډګر هرکلۍ اویلو. د دواړو مشرانو تر منځ شخصي اړیکې ټولو ته معلومی دی. ګجرات د مهاتما ګاندي ټاټوبی دی او سابرمتي آشرم ته د ولسمشر ټرمپ سفر پدی ترڅ کی د پام وړ وو چی ګاندهی د برتانوي حکومت له منګولو څخه د هند په ازادولو کې ستر رول لوبولی وو. هندوستان په بله پلمه د ښاغلي ټرمپ دومره هرکلۍ نه شوه کولی بیله ددی چی د ټول هندوستان څخه د سلو زرو څخه زیاتو خلکو په شتون کې د احمد آباد په موټیره ، کې د نړۍ ترټولو لوی د کرکټ لوبغالی پرانیزي. د یو څو ساعتو په جریان کې ، د متحده ایالاتو ولسمشر د کوربه هندي ایالتونو څخه د میوزیک او نڅا نندارې له لارې هندي کلتور او فرهنګ په تماس کی راغی .

ولسمشر ټرمپ د هندي تنوع او د هندي ټولنې کلتوري ښکلا څخه زښت متاثره شو . البته په موټیره سټیډیم کې د هغه وینا د ملیونونو هنديانو غوږونو ته یوه موسیقي وه چې هغه ته یې مستقیم غوږ ونیوو او یا په راډیو او تلویزیون یی د هغه وینا ته غوږ ونیولو. ولسمشر ډونالډ ټرمپ د ۷ لسیزو په لنډه موده کې غربت په کمولو ، اقتصادي ودې ، ساینسي او تخنیکي پرمختګونو او نورو ډیرو برخو کې د هند د ودې ستاینه وکړه .

هغه وویل چې هند د نړۍ یو لوی اقتصاد ګرځیدلی او په حقیقت کې هندوستان په دې وروستیو کې د نړۍ د ۵م لوی اقتصادي قدرت په توګه د جی ډي پی له پلوه د بریتانیه ځای واغیست. هغه په امریکایی ټولنې کی د شاوخوا څلور ملیونه هندي - امریکایانو مرستې زړه سره رایادی کړی 

سربیره پردې ، ولسمشر ټرمپ د هند - متحده ایالاتو په ستراتیژیکو اړیکو کې د پام وړ پرمختګ په ګوته کړ او وړاندوینه یې وکړه چې دا شراکت او اړیکه دوام لري او په راتلونکی کی به هم دوام ولري. ولسمشر ټرمپ د ترهګرۍ له ګواښ سره د مبارزې په برخه کې د هند - متحده ایالاتو د همغږو هڅو اړتیا په پرګوته کولو سره ، په لویدیځ آسیا کې د داعش ړنګیدل او د هغوی مشرانو له منځه وړل راپیاد کړل. هغه پر پاکستان د فشار راوړلو لپاره خپلې هڅې پرګوته کړې او پاکستان یې د متحده ایالاتو یو ملګری په توګه بیان کړو. ګڼو لپاره ، پاکستان ته د هغه حواله غیر ضروري وه. البته په افغانستان کې د جګړې پای ته رسولو لپاره د روانو هڅو په نظرکی د هغه څرګندونې مهمې وې. په خپلو څرګندونو کی توازن ساتلو لپاره هغه د ترهګرۍ سره په مبارزه کې د هند او امریکا پر رول ټینګار وکړ. یوازې په دې وروستیو کې ، هند ، متحده ایالات او حتی چین دا ډاډ ترلاسه کولو کې سره یوځای شول چې پاکستان د ترهګرو تمویل کونکو هیوادونو په خړلیست کې پاتې شی. د ټرمپ انتظامۍ په پاکستان بندیزونه وضع کړی یا یی له پاکستانه پانګی بیرته نیولی. د امریکایی کړنو شا لید کې ، د پاکستان په اړه د هغه بیان د پوهیدو وړ دی.هغه د هند او متحده ایالاتو تر منځ د دفاعي او امنیتي همکاریو د زیاتیدونکي اهمیت د څرګندولو په خاطر هیڅ وار خطا نکړو ، د دوه اړخیزو نظامي تمرینونو حساسیت یې په ګوته کړ ، او هند ته یې د عالي پوځي سامان الاتو د پلور ژمنه ورکړه.

په پیل کې داسې بریښيدل چې هندوستان ته د هغه د لومړي سفر لومړۍ مرحله به یوازې نظری او سمبولیک وي. مګر په واقعیت کې ، دا هم د پام وړ ثابت شو. ولسمشر ټرمپ د خپلې وینا په اوږدو کې د هندي عامو خلکو سره د هند او متحده ایالاتو د ستراتیژیکې ملګرتیا اهمیت ، ژورتیا او ګټور په غیر مشروط شرایطو ازادانه خبری وکړی. هغه همدا شان اشاره ورکړه چې د دواړو هیوادونو ترمینځ د دوه اړخیزو اړیکو لا پراختیا لپاره نوې لوی تړون مخ په لار دی 

دې ټینګار ته اړتیا ده چې په بدل شوي نړیوال نظم کې ، د شوروي اتحاد له ړنګیدو او د سړې جګړې له پای ته رسیدو راهیسې ، د نړۍ په چارو کې یو له پرمختګونو څخه د هند - متحده ایالاتو ترمنځ د ستراتیژیک مشارکت وده ده. پداسې حال کې چې دا وده مخ په وړاندی روانه ده ، خنډونه او ننګونې منځ ته راغلی . له کله راهیسې چې ډونلډ ټرمپ واک ته رسیدلی هند په ځانګړي ډول د سوداګرۍ او تجارت په برخو کې نوي ننګونې تجربه کړي. خو د دواړو هیوادونو د لوړ پوړو چارواکو لخوا هڅې روانې دي ترڅو د جوړجاړي معاملې وکړي.

تمه کیده چې دا تړون به هند ته د ټرمپ د سفر پرمهال لاسلیک شي. مګر دواړه حکومتونه ډیر وخت ته اړتیا لري او هیله مند دی چې په تړون به ډیر زر هوکړه وشي.